சென்னை பாக்ஸ் ஆபிஸ் டாப் 10 (செப். இறுதி வாரம்)

திரையுலகுக்கு செப்டம்பர் கடைசி வார இறுதி கொஞ்சம் பரபரப்பாகவே இருந்தது. 20-20 உலகக்கோப்பை போட்டி முடிந்து விட்டதால் தியேட்டர்களில் கூட்டம் வழக்கத்தை விட அதிகமாகவே அலைமோதியது. செப்டம்பர் மாத ஆரம்பம் திரையரங்குகளுக்கு ஏமாற்றமளித்தாலும் முடிவு மகிழ்ச்சி அளித்திருக்கிறது.

01. மலைக்கோட்டை : புரட்சித் தளபதி என்ற புதியபட்டத்துடன் களமிறங்கியிருக்கிறார் விஷால். மசாலா படமான மலைக்கோட்டை நல்ல வசூலை ஆரம்பத்திலேயே கொடுத்திருக்கிறது. பத்திரிகை விமர்சனங்கள் படத்துக்கு அவ்வளவாக சாதகமாக இல்லையென்ற போதிலும் விஷாலின் மாஸ் படத்தை காப்பாற்றியிருக்கிறது. திரையிட்ட இடமெல்லாம் திருவிழா கோலம்.

02. மருதமலை : செப்டம்பர் 2ம் வாரம் வெளியாகி தொடர்ந்து முதலிடத்தில் இருந்த மருதமலை இவ்வாரம் இரண்டாம் இடத்துக்கு தள்ளப்பட்டிருக்கிறது. வெளியான மூன்றே வாரங்களில் சென்னையில் ஒன்றேகால் கோடியை வசூலில் நெருங்கியிருக்கிறது.

03. சத்தம் போடாதே : பெரிய எதிர்ப்பார்ப்புடன் வந்த திரைப்படம். பத்திரிகைகள் பாராட்டினாலும் ரசிகர்கள் கைகொடுக்க வேண்டுமே? மல்டிபிளக்ஸ்கள் மட்டும் அரங்கு நிறைகிறது.

04. நம்நாடு : அரசியலுக்கு வந்திருக்கும் சரத்குமார் நடித்த அரசியல் படம். பரபரப்பாக ஏதாவது படத்தில் இருக்கும் என்று நம்பிய ரசிகர்கள் ஏமாந்திருக்கிறார்கள். இதே கதையுடன் வெளியான டப்பிங் படம் ஒன்றினால் இப்படத்தின் வசூல் பாதிக்கப்பட்டிருக்கிறது.

05. உடம்பு எப்படியிருக்கு? : தெலுங்கில் இருந்து டப் செய்யப்பட்ட படம் ஆச்சரியகரமான வகையில் அரங்கு நிறைந்து ஓடுகிறது. தமிழ் ரசிகர்களுக்கு நன்கு அறிமுகமாக டாக்டர் ராஜசேகர் நடித்த படம் என்பதால் B மற்றும் C அரங்குகளில் நல்ல வரவேற்பு

06. வேகம் : சென்றவார இறுதியில் வெளியான வேகம் இன்னமும் வேகம் பிடிக்கவில்லை. எஸ்.வி.சேகரின் மகன் கதாநாயகனாக அறிமுகமாகியிருக்கிறார். பிரபு - குஷ்பு நீண்டநாட்களுக்கு பிறகு இணைந்து நடித்திருக்கிறார்கள்.

07. சிவாஜி : நூறு நாட்களை கடந்தும் பல தியேட்டர்களில் வெற்றிநடை போடுகிறார் சூப்பர் ஸ்டார். தமிழ் திரையுலகம் நினைத்துப் பார்க்க முடியாத மெகா வசூல்.

08. சிவி : ஆச்சரியமளிக்கும் வசூல். ஸ்டார் வேல்யூ, அதிக விளம்பரங்கள் இல்லாமல் வெளியாகியிருக்கும் சிவி நல்ல விமர்சனங்களை பெற்றிருக்கிறது.

09. அம்முவாகிய நான் : நான்கு வாரங்களை கடந்த நிலையில் வசூலில் சறுக்கியிருக்கிறாள் அம்மு. ரசிகர்களிடையே நல்ல படம் என்று பெயரெடுத்திருப்பது அம்முவின் சாதனை.

10. பள்ளிக்கூடம் : ஏழுவாரங்களை கடந்த பள்ளிக்கூடம் சென்ற வாரம் ஈயடித்தது.

DCR எனப்படும் Daily Collection Reportஐ அடிப்படையாக கொண்டு தயாரிக்கப்பட்டிருக்கும் பட்டியல்